నేనొక సినిమా అభిమానిని. వచ్చిన ప్రతి సినిమా చూడక పోయినా మంచి సినిమా, కొత్త దనం ఉన్న సినిమా అనిపించిన వన్నీ తప్పక చూస్తాను. చూసి ఊరుకోక పదే పదే స్నేహితులతొ చర్చిస్తాను. అసలు మనమైతే ఈ కథ ఈ లెవల్లో ఉండేది. హీరో ఎన్ట్రన్స్ ఇలా ఉంటుంది. ఇక్కడ ఇచ్చే ట్విష్ట్ కి ప్రేక్షకుడి దిమ్మ తిరిగి పోవాలి అని స్నేహితులం అందరం ఊహల్లో ఊరేగుతూ సరదాగా కబుర్లు చెప్పుకుంటూ గంటలు గడిపేస్తుంటాము. బ్లాగులు పరిచయమైన తరువాత ఆ కబుర్లే కథనాలుగా మార్చి బ్లాగులో పెట్టుకుంటే బాగుంటుంది కదా అన్న ఆలోచనకు రూపమే ఇలా మీముందుంది.
సినిమా గురించి పెద్దగా ఏమీ తెలియదు. ఆ తెలియని తనమే కొత్త దనానికి శ్రీకారం అని భావించి మూస పాత పద్ధతుల గురించి పెద్దగా ఆలోచించను. కలలే కానీ కార్య రూపమేమీ దాల్చలేదు. కలలు కలలుగానే మిగులుతాయో కార్యరూపం దాల్చుతాయో ఈ బ్లాగే చెప్పాలి. సినిమా చూసినతరువాత కూడా ఏవో కొత్త ఆలోచనలు రేగి రకరకాల రంగులు పులుముకుని సినిమా కలలు కంటూ కాలం గడిపే నాకులాంటి అభిమానులందరికీ స్వాగతం. సినీ పండితులందరికీ నమస్కారం.
